Calamaretu imbutìu
Ingredientis po 4 personis
16 calamaretus
1 cibudedda
1 tìtula de allu
30 gramus de prupa de pani
400 gramus de petza mòlia (mitadi procu e mitadi malloru)
1 ou
25 gramus de sèmini de opinu
ollu ermanu
sali
pìbiri
perdusèmini
po su sufritu
1 cibudda
1 tàmata tratacasada
1/2 tassa de binu
ollu ermanu
sali
po sa picada
30 gramus de mèndula
30 gramus de sèmini de opinu
1 tìtula de allu
Pica sa cibudda a finu e ponedda a friri in d-una sartaini cun pagu pagu ollu. tratacasa una tamata e aciungedda, poni sali. Aciungi su binu e coi po 8-10 munutus. Poni a unu costau.
Limpia e sciacua su calamaretu, boga sa conca, s'ossu, sa tinta e sa matza. Segandeddi is cambas e poneddas a unu costau.
Poni una pingiadedda cun àcua e fai coiri un'ou a tostau, pustis de 10 minutus bogandeddu e picaddu a finu. poni a unu costau.
Pica a finu sa cibudedda e faedda friri in d-una sartaini con pagu pagu ollu. Aciungi una tìtula de allu picada e is cambas picadas de su calamaretu. Aciungi sa petza mòlia e cundi cun sali e pibiri. Poninci sa prupa de pani (chi antis as postu in àcua tebi-tebi e tròciu), s'ou picau e su sèmini de opinu. Coxina po 4-5 minutus. Lassa sfridai.
Preni su calamaretu cun su fàrtziu e cerraddu cun d-unu palitu po dentis (no ddu prèngias meda, ca candu friet si podet crepari). Poni sali e pìbiri.
Poni pagu pagu ollu in d-una cassarola bàscia e lada, ponenci su calamaru aintru e fai indorari, aciungi, poni pagu pagu àcua, tupa e fai coiri po unus 30 minutus a fogu sulenu.
In d-unu murtaxu poni sa mèndula, su sèmini de opinu e una tìtula de allu, pista totu e aciungi a sa cassarola. Spruina cun perdusèmini picau e coxina po àterus 5 minutus.
Serbi callenti e aciungi, chi ti praxit, follas intreas de perdusèmini.