Pisci a scabèciu*

Po 4 personis

Ingredientis:

1 kg de pisci no mannu meda e inditau a friri (trìllia, pagellu, lissa, boga, etc.)

500 gramus de tomateddas spilloncadas

1 tassa de axedu de binu

2 tassas de binu biancu

2 titulas de allu

2 cibuddas

3 follas de lau

3 follas de sàlvia

3 pibiris de gravellu

1 papereddu de tzafaranu

80 gramus de simbula

ollu de olia

sali

Sciacua, smatza e boga sa scata, is gangas, is origas, is alettas e sa coa a su pisci, e poneddu a scolari. Poni in su fogu una sartaini manna cun ollu e fai callentari. Insimbula su pisci e poneddu a friri, circa de ddu furriari sena ddu segari. Pone a scolari in d-unu pratu cun paperi chi aciupat. In d-unu strexu de terra fai arrubiari 2 titulas de allu strecau in cuaturu culleras de ollu, candu pigat colori aciungi sa cibudda picada a finu e fai arrubiari, aciungi sa tomatedda, antis spilloncada e sedatzada, su lau, sa sàlvia e su pibiri de gravellu. Fai scallari su tzafaranu in d-una cicaredda e aciungi cussu puru. Arrangia de sali e fai coere po chi sa bànnia si callit unu pagheddu. Aciungi s'axedu e su binu e lassa sbentiari 5 minutus. Poni su pisci in mesu de sa bànnia e fai coere àterus 15 minutus. Su pisci a scabèciu est bonu fridu puru.

* Su fueddu "Scabèciu" ndi benit de su catalanu "escabetx" chi ndi dda pigau, gràtzias a is aràbus, de su fueddu persanu "Sikbâg": bànnia cun axedu.

#scabèciu #Sardegna #cibosardo