Sa cocoi prena
Ingredientis
Po su pillu:
1 chilu de simbula
3 culleras de ollu de olia o 50 gramus de olluseu
mesu litru de àcua tèbidi
10 gramus de lievitu de birra o framentu
sali
Po s'arreprenu:
1 chilu e mesu de patata bècia
200 gramus de casu de brebei mùstiu
150 gramus de casu axedu a mùrgia
unu matziteddu de abuleu
2 titulas de allu
1 cibudda
Traballa sa simbula paris a su lièvitu, a s'àcua tèbidi salìa e a s'ollu po assumancu unu cuartu de ora. Lassa axedai amontau, po un'ora.
Peristanti fai coere a buddiu sa patata e candu s'isfridat strecadda cun d-una frochita. In d-una sartaini cun pagu pagu ollu fai arrubiari sa cibudda e s'allu picaus a finu, pica s'abuleu puru e aciungi totu a sa patata. Streca su casu axedu e aciungi cussu puru.
Piga sa pasta e sterri unu pillu simbili a su de is culurgionis (chi siat artu unus 5 millimetrus), de cui bogandi circus de unus 10 centimetrus de ladu. In mesu a dònnia circu poni duas culleras prenas de arreprenu e serra sa cocoi pesendindi s'oru e traballendiddu che a su de sa pardula. Poni in forru callenti a 200° po una mesora, e lassa indorari (arregorda chi s'arreprenu est giai cotu).